በኡስታዝ አቡ ሀይደር
በአላህ ስም እጅግ በጣም ርኅሩህ በጣም አዛኝ በሆነው
ክብርና ምስጋና ለዓለማቱ ጌታ ለአላህ የተገባ ይሁን፡፡(አል-ፋቲሓ 2) ሰላምና ውዳሴ የሰው ዘር ታላቅ መሪ ለሆኑት ለነቢዩ ሙሐመድ (አል-አሕዛብ 56) ለመላው የአላህ መልክተኞች (አል-ሷፍፋት 181) የሐቅንም መንገድ በተከተለ ሁሉ ላይ ይሁን (ጣሀ 47)፡፡
7. አፍራሽ ተግባራት፡-
ሌላኛው የ”ላ ኢላሀ ኢልለሏህ”ን እምነት ከሚያፈርሱት ውስጥ አንዱ ‹‹ኒፋቅ›› ነው፡፡ ሙናፊቅ ማለት ቀጥታ ፍቺው፡- አስመሳይ ማለት ነው፡፡ ያም ማለት፡- ከውጭ ኢስላማዊ ገጽታን እያሳዩ በልብ ክህደትን አምቆ መያዝ ማለት ነው፡፡ ውጪያዊ ተግባሩ የሙስሊሞች አይነት ሆኖ፡ ልቡ ግን ከከሀዲያን ጋር ያደረ ማለት ነው፡፡ ሙናፊቅ፡ ከሙሽሪክና ከካፊር የበለጠ የሙስሊሞች ጠላትና አደጋ ነው፡፡ ምክንያቱም፡- ካፊሮችና ሙሽሪኮች ጠላትነታቸው በይፋ የሚታይ በመሆኑ ለመጠንቀቅ ይረዳል፡፡ ሙናፊቅ ግን የልቡን በልቡ ይዞ በውጪያዊ ማንነቱ ካንተ ጋር ተመሳስሎ የሚውል በመሆኑ መለየት አይቻልም፡፡ ወንድም መስሎ በመቅረብ ሚስጥርን በማውጣት ለጠላት አሳልፎ ይሰጣል፡፡ ቅዱስ ቁርኣን በሱረቱል በቀራህ መግቢያ ላይ ከ2-20 ባለው 19 አንቀጽ ውስጥ፡ ስለ ሙእሚኖች 4፣ ስለ ካፊሮች 2፣ ስለ ሙናፊቆች ደግሞ 13 አንቀጾችን አውርዷል፡፡ ይህም የሚያሳየው፡- ሙናፊቆች ለኢስላም ምን ያህል ጠንቅ እንደሆኑ ነው፡፡
ሀ. አይነቶቹ፡-
ኒፋቅም እንደ ወንድሞቹ ኩፍርና ሺርክ በሁለት ይከፈላል፡፡ እነሱም፡-
– ኒፋቁን አክበር (ትልቁ ኒፋቅ)፡- ይህ ማለት፡ ከላይ አማኝ መስሎ በልብ የሚፈጸም የክህደት ስራ፡ ባለቤቱን ከኢስላም አጥር የሚያስወጣ፡ ስራን በጠቅላላ የሚያበላሽ፡ ያለ ተውበት ከሞተም ለዘላለም እሳት የሚዳርግ ማለት ነው፡፡
– ኒፋቁን አስገር (ትንሹ ኒፋቅ)፡- ይህ ማለት፡ ሰውየው በልቡ አማኝ ሆኖ፡ በንግግሩና በተግባሩ የመናፍቃንን ባሕሪ የሚያንጸባርቅ፡ ስራው ከኢስላም ባያስወጣውም አላህ በራሕመቱ ወይም በነቢያችን ሸፋዐህ ካልታረቀው በስተቀር ለቅጣት የሚዳርገው፡ ከተቀጣም ለዘላለም በእሳት የማይዘወትርበት የሆነ ተግባር ማለት ነው፡፡
ለ. የመናፍቃን ባሕሪ በቅዱስ ቁርኣን፡-
1. አማኞችን ማታለል፡- አማኝ ሳይሆኑ ያመኑ መስለው በመቅረብ፡ ከሙእሚኖች ጎራ እንደሆኑ ሆኖ ለመታየት የአላህ ባሪያዎችን ለማታለል ይሞክራሉ፡፡ በሐቂቃው ግን እያታለሉ ያሉት ነፍሳቸውን እንጂ አማኞችን አይደለም፡፡
“وَمِنَ النَّاسِ مَنْ يَقُولُ آمَنَّا بِاللَّهِ وَبِالْيَوْمِ الْآخِرِ وَمَا هُمْ بِمُؤْمِنِينَ * يُخَادِعُونَ اللَّهَ وَالَّذِينَ آمَنُوا وَمَا يَخْدَعُونَ إِلَّا أَنْفُسَهُمْ وَمَا يَشْعُرُونَ ” سورة البقرة 9-8
“ከሰዎችም «በአላህና በመጨረሻው ቀን አምነናል» የሚሉ አልሉ፤ እነርሱም አማኞች አይደሉም፡፡ አላህንና እነዚያን ያመኑትን (ሰዎች) ያታልላሉ፤ የማያውቁ ሲኾኑ ነፍሶቻቸውን እንጅ ሌላን አያታልሉም፡፡” (ሱረቱል በቀራህ 8-9)::
“إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلَاةِ قَامُوا كُسَالَى يُرَاءُونَ النَّاسَ وَلَا يَذْكُرُونَ اللَّهَ إِلَّا قَلِيلًا ” سورة النساء 142
“መናፍቃን አላህን ያታልላሉ፤ እርሱም አታላያቸው ነው፤ (ይቀጣቸዋል)፤ ወደ ሶላትም በቆሙ ጊዜ ታካቾች ሰዎችን የሚያሳዩ ሆነው ይቆማሉ፤ አላህንም ጥቂትን እንጂ አያወሱም።” (ሱረቱ-ኒሳእ 142)፡፡
2. ውሸተኝነት፡- መልክተኛው ዘንድ በመምጣት፡- እኛ እኮ አንተ የአላህ መልክተኛ መሆንህን እንመሰክራለን! በማለት በልባቸው የሌለውን ሲያወሩ፡ ጌታችን ውሸታሞች መሆናቸውን መሰከረ፡-
“إِذَا جَاءَكَ الْمُنَافِقُونَ قَالُوا نَشْهَدُ إِنَّكَ لَرَسُولُ اللَّهِ وَاللَّهُ يَعْلَمُ إِنَّكَ لَرَسُولُهُ وَاللَّهُ يَشْهَدُ إِنَّ الْمُنَافِقِينَ لَكَاذِبُونَ ” سورة المنافقون 1
“መናፍቃን በመጡህ ጊዜ አንተ የአላህ መልክተኛው መሆንህን በእርግጥ (ምለን) እንመሰክራለን ይላሉ፤ አላህም አንተ በ እርግጥ መል ዕክተኛ መሆንህን ያውቃል፤ አላህም መናፍቃን (ከልብ እንመሰክራለን በማለታቸው) ውሸታሞች መኾናቸውን ይመሰክራል።” (ሱረቱል ሙናፊቁን 1)፡፡
3. በአማኞች ማሾፍ፡- ሙእሚኖች ላይ በመጠቋቆም ማሾፍና መቀለድ ዋና መለያቸው ነው፡፡ የሙስሊሞችንም እምነት እንደ ቂል ይመለከቱታል፡-
“وَإِذَا قِيلَ لَهُمْ آمِنُوا كَمَا آمَنَ النَّاسُ قَالُوا أَنُؤْمِنُ كَمَا آمَنَ السُّفَهَاءُ أَلَا إِنَّهُمْ هُمُ السُّفَهَاءُ وَلَكِنْ لَا يَعْلَمُونَ * وَإِذَا لَقُوا الَّذِينَ آمَنُوا قَالُوا آمَنَّا وَإِذَا خَلَوْا إِلَى شَيَاطِينِهِمْ قَالُوا إِنَّا مَعَكُمْ إِنَّمَا نَحْنُ مُسْتَهْزِئُونَ ” سورة البقرة 14-13
“ለነሱም «ሰዎቹ እንዳመኑ እመኑ» በተባሉ ጊዜ «ቂሎቹ እንዳመኑ እናምናለን?» ይላሉ፡፡ አዋጅ ንቁ እነርሱ ቂሎቹ እነርሱው ናቸው፤ ግን አያውቁም፡፡ እነዚያንም ያመኑትን በተገናኙ ጊዜ «አምነናል» ይላሉ፡፡ ወደ ሰይጣኖቻቸውም ባገለሉ ጊዜ «እኛ ከናንተ ጋር ነን፤ እኛ (በነሱ) ተሳላቂዎች ብቻ ነን» ይላሉ፡፡” (ሱረቱል በቀራህ 13-14)፡፡
4. ከሀዲያንን መወዳጀት፡- እነሱ ዘንድ ከሙስሊሞች ጋር ወዳጅ መሆን በፍጹም አይታሰብም፡፡ የነሱ የልብ ወዳጆች ካፊሮችና ሙሽሪኮች በጠቅላላ የኢስላም ጠላቶች ናቸው፡-
“بَشِّرِ الْمُنَافِقِينَ بِأَنَّ لَهُمْ عَذَابًا أَلِيمًا * الَّذِينَ يَتَّخِذُونَ الْكَافِرِينَ أَوْلِيَاءَ مِنْ دُونِ الْمُؤْمِنِينَ أَيَبْتَغُونَ عِنْدَهُمُ الْعِزَّةَ فَإِنَّ الْعِزَّةَ لِلَّهِ جَمِيعًا ” سورة النساء 139-138
“መናፍቃንን፣ ለነርሱ አሳማሚ ቅጣት ያላቸው መሆኑን አብስራቸው። እነዚያ ከምእመናን ሌላ ከሐዲዎችን ወዳጆች አድርገው የሚይዙ፣ እነሱ ዘንድ ልቅናን ይፈልጋሉን? ልቅናም ሁሉ ለአላህ ብቻ ነው።” (ሱረቱ-ኒሳእ 138-139)፡፡
5. ከአላህ ሸሪዓህ መሸሽ፡- በፍጹም በአላህ ህግ መዳኘትን አይፈልጉም፡፡ እሱን የሚፈልጉት ምናልባት ሐቅ ሲኖራቸው ብቻ ነው፡፡ ከዛ በተረፈ የነሱ ምርጫ የጣኦት ህግ ነው፡-
“أَلَمْ تَرَ إِلَى الَّذِينَ يَزْعُمُونَ أَنَّهُمْ آمَنُوا بِمَا أُنْزِلَ إِلَيْكَ وَمَا أُنْزِلَ مِنْ قَبْلِكَ يُرِيدُونَ أَنْ يَتَحَاكَمُوا إِلَى الطَّاغُوتِ وَقَدْ أُمِرُوا أَنْ يَكْفُرُوا بِهِ وَيُرِيدُ الشَّيْطَانُ أَنْ يُضِلَّهُمْ ضَلَالًا بَعِيدًا ” سورة النساء 60
“ወደ እነዚያ፣ እርሱ ባንተ ላይ በተዋረደውና ከአንተ በፊትም በተወረደው አምነናል ወደሚሉት አላየህምን? በርሱ እንዲክዱ በእርግጥ የታዘዙ ሲሆኑ ወደ ጣዖት መፋረድን ይፈልጋሉ፤ ሰይጣንም (ከውነት) የራቀን መሳሳት ሊያሳስታቸው ይፈልጋል።” (ሱረቱ-ኒሳእ 60)፡፡
6. ባለ ሁለት ፊት መሆናቸው፡- ሙስሊሞች በአላህ እርዳታ ድልን ሲጎናጸፉና በጠላታቸው ላይ ሲርረዱ፡ መናፍቃን ይመጡና እኛም እኮ ከናንተ ጋር ነበርን ይላሉ፡፡ ሙስሊሞች በወንጀላቸው ወይም አንድነታቸውን ባለመጠበቃቸው ሰበብ አላህ ከሀዲያንን ሲሾምባቸው ደግሞ፡ መናፍቃን በሌላኛው ፊታቸው ወደነሱ በመሄድ፡- እኛ እኮ ከናንተ ጋር ነበርን፡፡ ሙስሊሞቹም እንዳያጠቋቹ ስንከላከል ነበርን ይላሉ፡-
“الَّذِينَ يَتَرَبَّصُونَ بِكُمْ فَإِنْ كَانَ لَكُمْ فَتْحٌ مِنَ اللَّهِ قَالُوا أَلَمْ نَكُنْ مَعَكُمْ وَإِنْ كَانَ لِلْكَافِرِينَ نَصِيبٌ قَالُوا أَلَمْ نَسْتَحْوِذْ عَلَيْكُمْ وَنَمْنَعْكُمْ مِنَ الْمُؤْمِنِينَ فَاللَّهُ يَحْكُمُ بَيْنَكُمْ يَوْمَ الْقِيَامَةِ وَلَنْ يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلًا ” سورة النساء 141
“እነዚያ በእናንተ (የጊዜን መዘዋወር) የሚጠባበቁ ናቸው፤ ለናንተም ከአላህ የሆነ አሸናፊነት ቢኖራችሁ ከናንተ ጋር አልነበርንምን? ይላሉ፤ ለከሐዲዎችም ዕድል ቢኖር (ከአሁኑ በፊት) በናንተ ላይ አልተሾምንምን? (እና አልተውናችሁምን?) ከምእመናንም አደጋ አልከለከልናችሁምን? ይላሉ። አላህም በትንሣኤ ቀን በመካከላችሁ ይፈርዳል፤ አላህም ለከሐዲዎች በምእመናን ላይ መንገድን በፍጹም አያደርግም።” (ሱረቱ-ኒሳእ 141)፡፡
7. በመጥፎ ማዘዝና ከመልካም መከልከል፡- የምእመናን ባሕሪ፡- ሰዎችን በጥሩ ማዘዝና ከመጥፎ መከልከል ሲሆን፡ መናፍቃን ግን ከዚህ በተቃራኒ በመቆም ሰዎችን በመጥፎ ማዘዝና ከመልካም መከልከል እንዲሁም ለመልካም ነገር እጃቸውን ከመለገስ መሰብሰብና አላህን ከማውሳት መዘንጋት ነው፡-
“الْمُنَافِقُونَ وَالْمُنَافِقَاتُ بَعْضُهُمْ مِنْ بَعْضٍ يَأْمُرُونَ بِالْمُنْكَرِ وَيَنْهَوْنَ عَنِ الْمَعْرُوفِ وَيَقْبِضُونَ أَيْدِيَهُمْ نَسُوا اللَّهَ فَنَسِيَهُمْ إِنَّ الْمُنَافِقِينَ هُمُ الْفَاسِقُونَ ” سورة التوبة 67
“መናፍቃንና መናፍቃት ከፊሎቻቸው ከከፊሉ ናቸው፤ በመጥፎ ነገር ያዛሉ፤ ከደግም ነገር ይከለከላሉ፤ እጆቻቸዉንም (ከልግስና) ይሰበስባሉ፤ አላህን ረሱ ስለዚህ (እርሱ) ተዋቸዉ፤ መናፍቃን አመጠኖቹ እነሱ ናቸዉ።” (ሱረቱ-ተውባህ 67)፡፡
8. የሂዳያ እንቅፋት መሆን፡- መናፍቃን ወደ አላህና መልክተኛው መንገድ ኑ ተብለው በተጠሩ ጊዜ፡ ለጥሪው ተገቢውን ምልሽ በመስጠት እንኳን ሊመጡ ሌላውንም ሰው እንዳይመጣ እንቅፋት በመሆን በር ሲዘጉ ታገኛቸዋለህ፡-
“وَإِذَا قِيلَ لَهُمْ تَعَالَوْا إِلَى مَا أَنْزَلَ اللَّهُ وَإِلَى الرَّسُولِ رَأَيْتَ الْمُنَافِقِينَ يَصُدُّونَ عَنْكَ صُدُودًا ” سورة النساء 61
“ለነርሱም፦ አላህ ወደ አወረደው (ቁርአን)ና ወደ መልክተኛው ኑ፣ በተባሉ ጊዜ መናፍቃን ከአንተ መሸሽን ሲሸሹ ታያቸዋለህ።” (ሱረቱ-ኒሳእ 61)፡፡
አላህ ከኒፋቅና ከሙናፊቆችይጠብቀን፡፡
በተሰማሩበት መስክ የሒዳያ ኢስላማዊ ማዕከል አባል በመኾን ዳዕዋውን ማገዝ ከፈለጉ በሚከተለው ማስፈንጠሪያ የአባልነት ቅፅ በመሙላት ሊቀላቀሉን ይችላሉ፦
የአባልነት ፎርሙን ለመሙላት ይህንን ይጫኑ
ማዕከላችንን የሚሰራቸውን ስራዎች በቀጥታ ለመደገፍ፦
አካውንት – 1000499318212
የአካውንት ስም – Hidaya Islamic Center
በአጭር ቁጥር – 8212 መጠቀም ይችላሉ።


